ភ្នំពេញ៖ នាយករដ្ឋមន្ត្រី សម្ដេចធិបតី ហ៊ុន ម៉ាណែត បានបញ្ជាទៅក្រសួងការពារជាតិឱ្យពិនិត្យឡើងវិញសម្រាប់ការប្រឡងជ្រើសរើសនាយទាហានដោយថា បច្ចុប្បន្ននេះកម្ពុជាមាននាយទាហានក្នុងចំនួនច្រើនលើសពលទាហាន ដើម្បីពង្រឹងគុណភាពក្នុងជួរកងទ័ព។

ថ្លែងពីវិទ្យាស្ថានបច្ចេកវិទ្យាកម្ពុជារាជធានីភ្នំពេញ ក្នុងទិវាគ្រូបង្រៀនថ្ងៃព្រហស្បតិ៍ ទី៥ ខែតុលា ឆ្នាំ២០២៣នេះ សម្ដេចធិបតី ហ៊ុន ម៉ាណែត ថាការបណ្ដុះបណ្ដាលកាលពីកន្លងមកតែទៅលើនាយទាហានដែលធ្វើឱ្យចំនួននាយទាហានឡើងខ្ពស់ជាពលទាហាន ដែលថាត្រូវហ៊ានអាកាត់ដើម្បីឱ្យមានការរើសពលទាហានវិញ។

សម្ដេចថា៖ «ហើយកុំខ្លាចភាគីមិត្តគេកាត់ជំនួយបើសិនជាគេឱ្យតែ ៤ឆ្នាំមករៀនតែយើងយកមកបន្ទុក ៤០ឆ្នាំយើងយកមកធ្វើអី? នាយទាហានរៀនមកទៅណាបើគាត់ច្រើនពេកយើងតែងតាំងវាអត់កើត ព្រោះទាហានគឺតាមស័ក្កិវាមានតាមប្រអប់ដល់សុទ្ធតែនាយទាហានចេញមកស័ក្កិ១។ ស័ក្កិមួយត្រូវកាន់ទ័ពប៉ុន្មាន? ដល់ឥឡូវគិតថាស័ក្កិមួយគាត់គិតថាតូចជាគេដោយសារងាយទៅច្រើន អ៊ីចឹងត្រូវគិត»។

សម្ដេចថាការសម្រេចពីមុនដែលសម្រេចតាមផែនការមិនមែនជាកំហុសឆ្គងទេ តែថាពេលនេះគឺត្រូវសម្រាកបន្តិចសិនដើម្បីពិនិត្យ។ សម្ដេចបានស្នើឱ្យមានការពិភាក្សាជាមួយម្ចាស់ជំនួយចំពោះការបង្វែការបណ្ដុះបណ្ដាលពីនាយទាហាន មកជាជំនួយដើម្បីបណ្ដុះបណ្ដាលពលទាហានវិញផងដែរ៕